Felles front mot kraftprodusentane

Hører til strøm

Norske straumprodusentar må betale meir for utvikling av det felles straumnettet, det såkalla sentralnettet. - Det er urimeleg at desse kostnadene i større grad skal veltast over på forbrukarane, meiner Forbrukerrådet.

Øyvind Herseth Kaldestad Kommunikasjonsrådgiver forbrukerpolitikk, 05.12.2008 09:00

Forbrukerrådet, Norsk Industri, Forum for Strategisk Nettutvikling og Handels- og Servicenæringens Hovedorganisasjon har no sendt eit brev til Statnett med stønad til forslaget om at norske produsentar skal dekkje ein større del av kostnadene knytt til sentralnett.

- Forslaget om at produsentane skal betale meir er ein heilt nødvendig justering av spleiselaget med kundane. Etter oppfatninga vår burde auken vore betydeleg større, seier regiondirektør Olav Nyhus i Forbrukerrådet.

Utvikling

Det er eit stort behov for utvikling av sentralnettet. I neste tiårsperiode skal Statnett gjere store investeringar som er nødvendige for å sikre tilstrekkeleg straumforsyning til alle delar av landet, inkluderte å byggje ny overføringskapasitet mot utlandet.

- Det er naturleg at produsentane er med og betaler ein større del av dei nødvendige investeringane. Statsnett sitt forslag betrer balansen i kostnadsfordelinga mellom produsentar og forbrukarar, seier Olav Nyhus.

Produsentane betaler i dag betaler om lag 25 prosent av dei faste kostnadene til sentralnettet. Statnett si foreslåtte justering av produsentane sin tariff er frå 0,56 øre/kwh til 0,8 øre/kwh.

Sterk motstand

Statnett sitt forslag har møtt omfattande motstand frå norske produsentar, då dei meiner at dette forringar konkurransekrafta.

Forbrukarrådet og dei andre organisasjonane meiner at denne argumentasjonen ikkje er relevant i denne samanhengen.

- All den tida produsentane på lik linje med kundane genererer kostnader til sentralnettet, bør dei yte med delen sin. Konkurranseomsyn kan ikkje vere grunngiving for ikkje å betale for nettkostnadene, seier Olav Nyhus.

I brevet blir det også peikt på at med ei forventa auka inntektsramme framover vil Statnetts forslag same kva ikkje forandre overskotet til produsentane vesentleg.

- Ser ein heile det norske kraftnettet samla, betaler norske produsentar ein svært liten del av dei samla kostnadene, seier Olav Nyhus. Utan rasjonell grunngiving for anna løysing, bør kostnadsfordelinga vere 50/50.

- Og i ei tid med finanskrise, er det vel heller omsynet til kundane som burde vege tyngst og ikkje omsynet til norske produsentar med eit særs godt inntektsgrunnlag.

- Forslaget om at produsentene skal betale mer er en helt nødvendig justering av spleiselaget med kundene. Etter vår oppfatning burde økningen vært betydelig større, sier Olav Nyhus. (Foto: )