Sikrar framleis lave flyprisar

Hører til flyreiser - dine rettigheter

Forbrukarrådet er fornøgd med at forbodet mot bonuspoeng på innanlands luftfart no blir permanent, og at alle flyselskap blir inkluderte.

John E. Andersson Kommunikasjonsrådgiver forbrukerpolitikk, 21.06.2007 10:13

- Avgjerda vil auke moglegheiten for framleis relativt lave prisar på innanriksflyreiser i framtida. Forslaget er også i tråd med kva Forbrukarrådet har meint i denne saka, og forbrukarane vil no bli sikra meir oversiktlege marknader, seier rådgivar i Forbrukarrådet Christer Tonheim.

Det er Fornyings- og administrasjonsminister Heidi Grande Røys som endrar forslaget om eit forbod mot bonusprogram på innanriks luftfart til også å omfatte aktørar med mindre enn 15 prosent marknadsdel.

Fekk gjennomslag

Dette er klart etter at Fornyings- og administrasjonsdepartementet har vurdert høyringssvara på forslaget til ny forskrift. Forbrukarrådet er blant dei som dermed får gjennomslag for innvendingane sine.

Kunne gitt høgare prisar

Forbrukarrådet sa i eit høyringssvar bl.a. at eit slikt unnatak ville medfører unødvendig komplisering av marknaden. Utforminga til forskrifta er eigna til å auke forbrukarane sine søkje- og byttekostnader - og ville kunne medføre høgare prisar på sikt.

Det blir forbod mot bonusprogram på innanriks luftfart, det vil også omfatte aktørar med mindre enn 15 prosent marknadsdel. (Foto: scanpix)